Аса ауыр салмақтағы украиналық Александр Усик пен америкалық Тайсон Фьюри арасындағы жекпе-жекке тұңғыш рет жасанды интеллект төрелік етеді. Бұл туралы Сауд Арабиясының ойын-сауық істері жөніндегі бас басқармасының төрағасы Турки әл аш-Шейх Х желісіндегі ресми парақшасында мәлімдеді, деп хабарлайды KAZ.NUR.KZ.
21 желтоқсанДА Сауд Арабиясының Эр-Рияд қаласында WBC, WBO және IBO нұсқалары бойынша аса ауыр салмақтағы әлем чемпионы Александр Усик пен британиялық Тайсон Фьюри арасындағы екінші жекпе-жек өтеді.
Сауд Арабиясының ойын-сауық істері жөніндегі бас басқармасының төрағасы Турки әл аш-Шейх әлемдік бокс қауымдастығын ерекше идеяларымен таңғалдырып келеді. Солардың бірін ол алдағы Усик пен Фьюри жекпе-жегінде сынақтан өткізбек.
"Тарихта тұңғыш рет жекпе-жекке жасанды интеллект төрелік етеді. The Ring ұсынатын бұл жаңашылдық адам қатесінен және субъективтіліктен азат төреші ретінде есептеледі. Бұл тәжірибе ресми нәтижеге әсер етпейді, бірақ ғасырдың ең ірі жекпе-жегі – Усик пен Фьюри жекпе-жегі кезінде алғаш рет тәжірибе ретінде жүзеге асады", - деп жазды Турки әл аш-Шейх.
Айта кетейік, Усик пен Фьюри арасындағы алғашқы жекпе-жек осы жылдың 18 мамырында Эр-Риядта өткен болатын. Сол кезде украиналық боксшы төрешілердің шешімімен жеңіске жеткен еді.
Мақаланың түпнұсқасы: https://kaz.nur.kz/sport/boxing/2201658-boks-tarihynda-tunggysh-ret-chempiondyq-zhekpe-zhekke-zhasandy-intellekt-torelik-etedi/
