WBO және IBF тұжырымдары бойынша орта салмақтағы әлем чемпионы Жәнібек Әлімханұлы келесі жекпе-жектерін қашан өткізетіні туралы жоспарларын айтты. Бұл туралы KAZ.NUR.KZ боксшының X желісіндегі ресми парақшасына сілтеме жасап хабарлайды.
Орта салмақта өнер көрсететін кәсіпқой боксшы 2025 жылдың көктемінде жұдырықтасуды жоспарлап отырғанын жазды.
"Көктемде чемпиондық белбеулерімді қорғаймын деп ойлаймын, содан кейін Хамза Шираз – Карлос Адамес жекпе-жегінің жеңімпазымен жекпе-жек өткіземін! Иншаллах, менде үш чемпиондық белбеу болады", - деп жазды Жәнібек Әлімханұлы.
Жәнібек Әлімханұлы мен WBO титулына міндетті үміткер болған британиялық Хамза Шираз арасында жекпе-жек өтеді деп жоспарланған еді. Тіпті WBO бұл жекпе-жекке арналған бәссауданы да жариялады. Алайда Хамза Шираздың командасы жекпе-жектен бас тартты. Британиялық боксшы 22 ақпанда WBC титулы үшін Карлос Адамеспен жұдырықтасатын болды.
Еске салайық, Жәнібек Әлімханұлы 4 қазанда Сиднейде (Аустралия) жаңазеландиялық Андрей Михайловичпен жұдырықтасып, нокаутпен жеңген еді.
Мақаланың түпнұсқасы: https://kaz.nur.kz/sport/boxing/2205893-zhanibek-alimhanuly-ushinshi-chempiondyq-belbeu-turaly-mangyzdy-malimdeme-zhasady/
