Бүгін қазақстандық боксшы Махмұд Сабырхан мен аралас жекпе-жек шебері Қаршыға Дәуітбек Ұлттық ұланның құрылған күніне арналған салтанатты жиынға қатысты. Іс-шара Шымкенттегі №6698 әскери бөлімінде өтті, деп хабарлайды KAZ.NUR.KZ Өңірлік коммуникациялар қызметіне сілтеме жасап.
Мерекелік концерттен соң жауынгерлермен кездескен спортшылар Ұлттық ұланның құрылған күнімен құттықтады. Кездесу барысында олар жеңіске жету жолындағы қажырлы еңбек, батылдық пен патриоттық рух туралы сөз қозғады.
Олар әскери қызметшілерге ел қорғауда атқарып жатқан абыройлы қызметтері үшін үлкен алғыс білдірді. Кездесу соңында әскери бөлім басшылығы Қазақстанның көк туын әлемдік аренада көтеріп, ел мәртебесін арттырып жүрген спортшыларға құрмет көрсетіп, арнайы сыйлықтар табыстады.
Мақаланың түпнұсқасы: https://kaz.nur.kz/sport/boxing/2210522-ulttyq-ulan-qurylgan-kun-mahmud-sabyrhan-shymkenttik-zhauyngerlermen-kezdesti/
