Бокстан әлем кубогында Қазақстан ұлттық құрамасы үшінші орынға ие болды

Бразилияның Фос-ду-Игуасу қаласында World Boxing федерациясының ұйымдастыруымен өткен Әлем кубогының кезеңі аяқталды. Ұлттық құрама қоржынында үш алтын, бір күміс және үш қола медаль бар, деп хабарлайды KAZ.NUR.KZ Ұлттық Олимпиадалық комитетке сілтеме жасап.

ҰОК мәліметінше, финалдық кезеңнің кешкі сессиясында қазақстандық үш боксшы алтын жүлде үшін жұдырықтасты.

80 келіден жоғары салмақта Валерия Аксенова Венгрия өкілі Жофия Сирамен кездесіп, 5:0 есебімен айқын басымдықпен жеңіске жетті.

Сұлтанбек Айбарұлы 85 келіге дейінгі салмақта бразилиялық Кауе Белинимен қолғап түйістірді. Нәтижесінде отандасымыз 4:1 есебімен басым түсті.

Ал 65 келіге дейінгі салмақта Аида Әбікеева өзбекстандық Навбахор Хамидоваға 5:0 есебімен жол берді.

Нәтижесінде ұлттық құрама қоржынында үш алтын, бір күміс және үш қола медаль бар.

Айта кетейік, бұған дейін Виктория Графеева (60 келіге дейін) жеңімпаз атанып, ел қоржынына алғашқы алтынды салса, Алуа Балқыбекова (51 келіге дейін), Жібек Жарасқызы (80 келіге дейін), Диас Молжігітов (80 келіге дейін) жарысты қола жүлдемен аяқтады. Осылайша ұлттық құрама жалпы командалық есепте үшінші орынға жайғасты.

Бірінші орынға Бразилия ие болса (4 алтын, 5 күміс), екінші орынға Қытай тұрақтады (4 алтын, 1 қола).

Мәтіннен қате тапсаңыз, бізге жазыңыз