Украина құрамасы ресейліктер қатысатын дзюдодан әлем чемпионатына бойкот жариялады

Дзюдодан Украина құрамасы 7-14 мамыр аралығында Катар астанасы Дохада өтетін әлем чемпионатына қатысудан ресми түрде бас тартты. Бұл туралы sportarena.com сайтына сілтеме жасаған KAZ.NUR.KZ хабарлайды.

Украиналық спортшылардың әлемдік додадан бас тартуына Ресей мен Беларусь атлеттерінің аталған жарысқа қатысуы себеп болып отыр.

Халықаралық дзюдо федерациясы (IJF) Дохадағы әлем чемпионатына Ресей мен Беларусь балуандарының нейтралды түрде қатысуына рұқсат берді. Алайда Украина тарапының мәліметінше, біріншілікте бақ сынайтын атлеттер арасында әскери қызметшілер де бар.

"Біз бұл жерден ешқандай нейтралдылық көріп тұрғанымыз жоқ. Одан бөлек, 2023 жылдың 28 наурызы күні Халықаралық Олимпиада комитеті жариялаған ұсынымға мүлде қарама-қарсы жайттар бар. ХОК мәліметінше, нейтралды атлеттер статусын әскери қызметке қатысы жоқ спортшылар ғана алады. Ал мұндағы спортшылардың басым бөлігі Ресей қарулы күштерінде тіркелген. Арнайы операция басталғалы бері 250 украиналық спортшы елі үшін жанын берді. Біз Халықаралық дзюдо федерациясының шешімінен түңіліп кеттік. Сондықтан Дохадағы әлем біріншілігінен бас тартамыз", - делінген федерация мәлімдемесінде.

Еске сала кетейік, Катар астанасы Дохада өтетін әлем біріншілігінде Париж Олимпиадасына берілетін рейтингілік ұпайлар саны артады.

Мәтіннен қате тапсаңыз, бізге жазыңыз