Қазақстандық спортшы Жәмила Бақбергенова әлемнің үздік балуаны атанды

Біріккен күрес әлемі (UWW) ұйымы әйелдер күресі бойынша жылдың қорытынды рейтингін жариялады. Бұл туралы KAZ.NUR.KZ UWW ұйымының ресми сайтына сілтеме жасап хабарлайды.

Аталған рейтингте қазақстандық спортшы Жәмила Бақбергенова 72 келіге дейінгі салмақтағы балуандар арасында 53 000 ұпаймен бірінші орында тұр. Ал екінші орынға АҚШ спортшысы Амит Элор (50 000 ұпай) жайғасса, үздік үштікті моңғолиялық балуан Энх-Амарин Даваанасан (48 700) түйіндеген.

Рейтинг балуандардың әлем, құрлық чемпионаттары мен Азия ойындарында көрсеткен нәтижелері бойынша жасалған.

Айта кетейік, Жәмила Бақбергенова биыл қыркүйек айында Сербияда өткен әлем чемпионатында қола жүлде иеленген еді. Кейін Қытайда жалауын түрген Азия ойындарында күміс жүлде жеңіп алды. Бұдан бөлек Жәмила – Азия чемпионатының үш дүркін иегері.

Мәтіннен қате тапсаңыз, бізге жазыңыз