Дзюдошы Әбиба Әбужақынова халықаралық турнирде жүлделі орын иеленді

Португалияның Одивелаш қаласында өтіп жатқан дзюдодан әлемдік Гран-при турнирінде Әбиба Әбужақынова қола медаль жеңіп алды. Бұл туралы KAZ.NUR.KZ Қазақстан дзюдо федерациясының Instagram-дағы ресми парақшасына сілтеме жасап хабарлайды.

48 келіге дейінгі салмақ дәрежесінде сынға түсетін Әбиба Әбужақынова үшінші орынға таласта Түркия өкілі Сила Ерсінді ұтты.

Осыған дейін қазақстандық дзюдошы 5 кездесу өткізіп, оның төртеуін жеңіспен аяқтаған еді. Әбиба іріктеу кезеңінде Эмбер Гершес (Нидерланд) пен Лаура Эспадинхадан (Франция) басым түсті. Бірақ ширек финалда жапониялық дзюдошы Кано Миякиден жеңіліп қалды. Ал "жұбаныш белдесуінде" Бельгия өкілі Лоис Петитті жеңіп, кіші финалға жолдама алды.

Посмотреть эту публикацию в Instagram

Публикация от Instagram

Айта кетейік, дзюдодан 2024 жылғы маусымның алғашқы ресми рейтингтік жарысы саналатын Гран-при турнирі 28 қаңтарға дейін өтеді. Бұл бәсекеге әлемнің 90 елінен 624 дзюдошы қатысып жатыр. Жарыс жеңімпазына әлемдік рейтингте 700 ұпай, ІІ орынға – 490, ал ІІІ орынға 350 ұпайдан қосылады.

Гран-при турниріне Қазақстан атынан 20 спортшы барды. Ерлер құрамасында Ержан Еренғайыпов, Дәурен Суюкенов, Жанарыс Рахметқали, Нұрсұлтан Зайзағалиев, Жансай Смағұлов, Дархан Қойбағар, Айбол Нысанәлі, Мәди Амангелді, Айдар Арапов, Құдірет Досымов, Ислам Бозбаев, Әділет Сапарғалиев бар. Ал әйелдер құрамасынан Әбиба Әбужақынова, Ғалия Тынбаева, Бақыт Құссақбаева, Эсмигүл Куюлова, Аруна Жангельдина, Камила Берліқаш жарысқа аттанған еді.

Мәтіннен қате тапсаңыз, бізге жазыңыз