Айдос Сұлтанғали қарсыласын айқын басымдықпен жеңіп, Олимпиадаға жолдама алды

Қазақстандық балуан Айдос Сұлтанғали Бішкекте (Қырғызстан) өтіп жатқан күрес түрлерінен Азия құрлығының іріктеу турнирінде Олимпиада жолдамасын иеленді. Бұл туралы KAZ.NUR.KZ тілшісі хабарлайды.

Грек-рим күресінен 60 кг салмақта сынға түскен Айдос Сұлтанғали жартылай финалда Тайбэй өкілі Джуи Чи Хуанганы 9:0 есебімен мерзімінен бұрын жеңді.

Айта кетейік, Айдос ширек финалда тәжікстандық Асламжон Азизовті 2:1 есебімен жеңіп, жартылай финалға өткен еді.

Бүгін, 21 сәуірде Бішкек боз кілемінде тағы үш қазақстандық балуан Олимпиада жолдамасы үшін белдеседі. Олар: Мейіржан Шермағанбет (67 кг), Демеу Жадыраев (77 кг), Әлімхан Сыздықов (130 кг).

Қазір Қазақстан қоржынында күрес түрлерінен Париж Олимпиадасының 5 жолдамасы бар: еркін күрес – 3, грек-рим күресі – 2.