Дзюдодан Қазақстан әйелдер құрамасы Хорватияда оқу-жаттығу жиынын өткізіп жатыр. Бұл туралы KAZ.NUR.KZ Қазақстан дзюдо федерациясының Instagram желісіндегі ресми парақшасына сілтеме жасап хабарлайды.
Хорватиядағы жаттығу Олимпиада ойындарына дайындықтың алғашқы кезеңі болып саналады. Оған Әбиба Әбужақынова, Ғалия Тынбаева, Эсмигүл Куюлова, Камила Берліқаш және Назгүл Маратова қатысып жатыр.
Айта кетейік, Париж Олимпиадасында дзюдодан Қазақстан әйелдер құрамасынан 3 спортшы сынға түседі. Әбиба Әбужақынова (48 кг) мен Камила Берліқаш (+78 кг) жекелей сайыста бақ сынаса, Эсмигүл Куюлова (63 кг) аралас-командалық жарыста белдеседі.
Ал ерлер құрамасынан Елдос Сметов (60 кг), Ғұсман Қырғызбаев (66 кг), Данияр Шамшаев (73 кг); Абылайхан Жұбаназар (81 кг), Нұрлыхан Шархан (-100 кг) ел намысын қорғайды.
Жазғы Олимпиада ойындарында дзюдо бәсекелері 27 шілде мен 3 тамыз аралығына жоспарланған.
Мақаланың түпнұсқасы: https://kaz.nur.kz/sport/fight/2119626-olimpiadaga-baratyn-qazaqstandyq-dziudoshy-qyzdar-horvatiiada-zhattygyp-zhatyr/
