Грек-рим күресінен Қазақстан құрамасының мүшесі Демеу Жадыраев Париж Олимпиадасының ширек финалына жолдама алды. Бұл туралы KAZ.NUR.KZ тілшісі хабарлайды.
Демеу Жадыраев 1/8 финалда Колумбия спортшысы Джейр Куеромен күресті. 77 кг салмақ дәрежесінде өткен белдесуде қазақстандық балуан мерзімінен бұрын 8:0 есебімен жеңді. Енді Жадыраев ширек финалда қырғыз балуаны Ақжол Махмудовпен кездеседі.
Еске салайық, кеше Париж боз кілеміне екі қазақстандық балуан шыққан еді. Әлімхан Сыздықов екінші белдесуінде Әзербайжан өкілі Сабах Шариатиден жеңіліп қалса, Айдос Сұлтанғали бірінші айналымда қырғыз балуаны Жоламан Шаршенбековке есе жіберді. Шариати финалға өтпегендіктен, Әлімхан жұбаныш белдесуіне қатыса алмады. Айдос та қырғызстандық спортшы ақтық кезеңге шыға алмауына байланысты жұбаныш белдесуінен тыс қалды.
Әзірге Қазақстан қоржынында Париж Олимпиадасының 1 алтын, 1 күміс, 2 қола жүлдесі бар. Төрт жылдықтың басты бәсекесі 11 тамызға дейін жалғасады.
Мақаланың түпнұсқасы: https://kaz.nur.kz/sport/fight/2145198-demeu-zhadyraev-qarsylasyn-merziminen-buryn-zhengip-olimpiadanyng-shirek-finalyna-otti/
