Чемпиондар лигасы: "Реал Мадрид", "Интер" және "Бавария" плей-офф кезеңіне өтті

УЕФА Чемпиондар лигасының топтық кезеңі аясындағы 4-тур ойындары аяқталды. "Реал Мадрид", "Интер" және "Бавария" футбол клубтары плей-офф кезеңіне жолдама алды, деп хабарлайды KAZ.NUR.KZ.

Мюнхендік "Бавария" өз алаңында Түркияның "Галатасарай" командасын 2:1 есебімен жеңді. Ойын нәтижесі бойынша 3 ұпай иеленген алаң қожайындары мерзімінен бұрын Чемпиондар лигасының плей-офф кезеңіне шықты.

"Бавария" сапында Харри Кейн дубль авторы атанса, "Галатасарай" сапында Бакамбу көзге түсті. Топтың кезеңдегі барлық матчта жеңген "Бавария" 12 ұпаймен 1/8 ойындарына жолдама алды.

"Реал Мадрид" командасы да топтық кезеңдегі барлық матчында жеңіп, 12 ұпаймен плей-офф ойындарына қадам басты. Чемпиондар лигасының "С" тобының 4-туры аясында мадридтік "Реал" өз алаңында португалияның "Брага" командасын 3:0 есебімен жеңді. Матчтың алғашқы минуттарында алаң қонақтары пенальтиден гол соға алмады. Ал алаң иелері сапындағы Браим Диас, Винисиус Жуниор мен Родриго өз мүмкіндіктерін сәтті пайдалана білді.

Чемпиондар лигасының топтық кезеңінің 4-тур аясындағы матчтардың нәтижелері:

"A" тобы

• "Бавария" (Германия) — "Галатасарай" (Түркия) - 2:1;
• "Копенгаген" (Дания) — "Манчестер Юнайтед" (Англия) - 4:3.

"B" тобы

• "Арсенал" (Англия) — "Севилья" (Испания) - 2:0;
• ПСВ (Нидерланды) — "Ланс" (Франция) - 1:0.

"C" тобы

• "Наполи" (Италия) — "Унион Берлин" (Германия) - 1:1;
• "Реал" (Испания) — "Брага" (Португалия) - 3:0.

"D" тобы

• "Реал Сосьедад" (Испания) — "Бенфика" (Португалия) - 3:1;
• "Ред Булл Зальцбург" (Австрия) — "Интер" (Италия) - 0:1.

Айта кетейік, УЕФА Чемпиондар лигасының өткен маусымдағы жеңімпазы – "Манчестер Сити". Пеп Гвардиола бастаған команда биыл чемпиондық атақты сақтап қалу үшін тырысатыны белгілі.