"Реал Мадридтің" бұрынғы ойыншысы және бапкері Зинедин Зидан аргентиналық футболшы Мессимен кездесті. Бұл туралы KAZ.NUR.KZ Adidas Football Youtube арнасына сілтеме жасап хабарлайды.
Футболдан Франция ұлттық құрамасының бұрынғы ойыншысы және капитаны Зидан мен "Интер Майамидің" шабуылшысы Лионель Месси Adidas Football жобасының кезекті түсіріліміне қатысты.
Екі футболшының арасындағы кездесу Зиданның Мессиге деген жылы лебізінен басталды:
"Кезінде бірге ойнай алмағанымыз өкінішті. Десе де қазір саған пас берудің сәті түсіп тұр екен", – деді Зидан.
"Мен бұған өте қуаныштымын! Сені қалай құрметтейтінімді өзің де білесің. Бір командада ойнамасақ та, бір-бірімізге қарсы матчтарда жолыққанбыз", – деп жауап берді Лионель.
Кездесу соңында екі футболшы бір-біріне ұлттық құрама жейделерін сыйға тартты.
Айта кетейік, қазан айында футболдан Аргентина құрамасы мен "Интер Майами" клубының жұлдызды шабуылшысы Лионель Месси мансабындағы сегізінші "Алтын добын" жеңіп алған еді.
Мақаланың түпнұсқасы: https://kaz.nur.kz/sport/football/2045163-bir-klubta-oinamaganymyz-okinisti-zidan-messige-zyly-lebiz-bildirdi/
