Қазақстан ұлттық құрамасының Еуропа чемпионатына шығуға тағы бір мүмкіндігі бар

Футболдан Қазақстан ұлттық құрамасы 2024 жылы Ұлттар лигасының плей-офф ойындарына қатысады, деп хабарлайды KAZ.NUR.KZ тілшісі.

Қазақстан ұлттық құрамасы Еуропа чемпионатына іріктеу кезеңі аясында Словения құрамасына қарсы ойын өткізді. Еуропа біріншілігінің жолдамасы сарапқа салынған матчта алаң иелері 2:1 есебімен жеңіске жетті. Ал қазақстандық команда іріктеу кезеңінің топтық жарысында 18 ұпай жинап, 4-орында қалды. Дания мен Словения құрамалары кәрі құрлықтың тартысты бәсекесіне тікелей жолдама алды.

Алайда Қазақстан ұлттық құрамасының Еуро-2024 турниріне жолдама алатын тағы бір мүмкіндігі бар. 2024 жылдың наурыз айында Ұлттар лигасының плей-офф ойындары басталады. Қазақстандық футболшылар 21 наурыз жартылай финалда Грекиямен күш сынасады. Егер сол матчта жеңсе, 26 наурызда Грузия – Люксембург жұбының жеңімпазымен финалда кездеседі. Шешуші ойынның жеңімпазы Германияда өтетін чемпионатқа қатысады.

Айта кетейік, Қазақстан ұлттық құрамасы 2022 жылы өткен УЕФА Ұлттар лигасының С тобында 13 ұпай жинап, 1-орын алған еді.

Мәтіннен қате тапсаңыз, бізге жазыңыз