"Реал Мадрид" футбол клубы Испания Суперкубогының финалына жолдама алды

Испания Суперкубогының бірінші жартылай финалында мадридтік екі клуб – "Реал" мен "Атлетико" кездесті. Бұл туралы KAZ.NUR.KZ тілшісі хабарлайды.

Сауд Арабия астанасы Эр-Риядта өткен матчта "Реал Мадрид" 5:3 есебімен жеңді.

Ойынның 7-минутында "Атлетико Мадрид" cапынан Марио Эрмосо бұрыштамадан гол соқты. "Реал Мадрид" сапынан Антонио Рюдигер есепті теңестірді. Ал Ферлан Менди "Реалдың" басымдығын арттырды. Бірақ 37-минутта "Атлетико" шабуылшысы Антуан Гризманн көзге түсіп, қарсыластың есепте алға шығуына жол бермеді. 78-минутта "Реал" қорғаушысы Антонио Рюдигер қателесіп, өз қақпасына гол салды. Жағдайды оның командаласы Даниэль Карвахаль түзетіп, есепті 3:3-ке жеткізді. Негізгі уақыт тең есеппен аяқталды.

Қосымша уақытта "Реал" сапынан Хоселу (116) мен Браим Диас (120+2) гол салды. Осылайша "Реал" командасы Испания Суперкубогының финалына жолдама алды.

11 қаңтар күні екінші жартылай финалда "Барселона" мен "Осасуна" кездеседі. Жеңген команда финалда "Реалға" қарсы ойнап, Суперкубокқа таласады.

Мәтіннен қате тапсаңыз, бізге жазыңыз