Леверкузендік "Байер" футбол клубы тарихында алғаш рет Германия жоғары лигасының чемпионатында алтын медаль жеңіп алды. Бұл туралы KAZ.NUR.KZ тілшісі хабарлайды.
Бундеслиганың 29-туры аясындағы матчта испаниялық маман Хаби Алонсоның шәкірттері өз алаңында "Вердер Бременді" 5:0 есебімен жеңіп, чемпиондықты мерзімінен бұрын қамтамасыз етті.
Ел чемпионатындағы алтын медальдарға қоса, "Байер" жеңіліссіз сериясын 43 матчқа дейін ұзартты. Осылайша италиялық "Ювентус" командасының 2012 жылғы жеңіліссіз кездесулер рекордын қайталады.
Соңғы 11 жылда Бундеслиганың чемпионы "Бавария" футбол клубы атанып келген еді. Тек "Боруссия Дортмунд" ғана өткен жылы мюнхендік командаға бәсекелестік таныта алды. Екі команда бірдей ұпай жинағанымен, қосымша көрсеткіштердің арқасында Томас Тухелдің шәкірттері бірінші орынға шыққан болатын.
Айта кетейік, бұл "Байердің" тарихындағы үшінші жүлдесі, осыған дейін клуб 1988 жылы УЕФА кубогын және 1993 жылы Германия кубогын жеңіп алған.
Мақаланың түпнұсқасы: https://kaz.nur.kz/sport/football/2084798-baier-futbol-kluby-algas-ret-germaniya-cempiony-atanyp-alemdik-rekordty-qaitalady/
