Футболдан Қазақстан құрамасының бұрынғы бапкері жаңа қызметке тағайындалды

Белгілі маман Вахид Масудов өскемендік "Алтай" футбол клубының бас бапкері болып тағайындалды. Бұл туралы KAZ.NUR.KZ "Алтайдың" Instagram желісіндегі ресми парақшасына сілтеме жасап хабарлайды.

Вахид Масудов – кеңестік және қазақстандық футболшы, жартылай қорғаушы, Қазақстан құрамасының бұрынғы жаттықтырушысы, КСРО спорт шебері. Ол бапкерлік мансабын 1996 жылы "Қайрат" ФК-да бастаған. 64 жастағы маман "Тараз", "Атырау", "Ақтөбе", "Ордабасы", "Мақтарал", 19 жасқа дейінгі Қазақстан жасөспірімдер құрамасын баптаған.

"Алтай" командасының жаттықтырушылар құрамына жергілікті мамандар кірді. Жаттықтырушының көмекшісі – Вячеслав Зинюков, дене шынықтыру жаттықтырушысы – Егор Скулкин, қақпашылар жаттықтырушысы – Илья Байтеряков.

Айта кетейік, "Алтай" футбол клубы бірінші лигада ойнайды. Қазір өскемендік команда турнир кестесінде 13 ұпаймен 10-орында тұр. Клубтың келесі ойыны 28 маусымда "Жетісайға" қарсы өтеді.

Мәтіннен қате тапсаңыз, бізге жазыңыз