"Астана" УЕФА Конференция лигасында "Челсимен" кездеседі

Бүгін, 30 тамызда Монакода УЕФА Конференция лигасының жеребесі тартылды. Елордалық "Астана" футбол клубының қарсыластары анықталды, деп хабарлайды KAZ.NUR.KZ.

Бұл турнирдің форматы биыл түбегейлі өзгерді. Елордалық "Астана" клубы УЕФА Конференция лигасының 2024/25 жылғы маусымында "Челси" (Англия), АПОЭЛ (Кипр), "Пафос" (Кипр), "Витория" (Португалия), "Нью-Сейнтс" (Уэльс), ТСЦ (Сербия) командаларымен кездеседі.

"Астана" жалпы алты матч өткізеді: үшеуі өз алаңында, үшеуі қонақта. "Астана" клубы өз алаңында "Челси", "Витория" және ТСЦ командаларына қарсы ойнайды, ал қонақта АПОЭЛ, "Нью-Сейнтс" және "Пафос" ұжымдарына қарсы кездесу өткізеді.

УЕФА Конференция лигасының биылғы маусымында 36 команда бақ сынайды. Жарыстың жаңа ережесі бойынша жалпы үздік шыққан сегіз команда 1/8 финалға тікелей жолдама алады, ал 9-24-орын алған клубтар қосымша ойындар өткізеді. Жеңіске жеткен командалар 1/8 финалға шығады.

Айта кетейік, қазіргі уақытта "Астана" Конференция лигасының өз алаңындағы матчтарын Астанада өткізетіні туралы ресми ақпарат жоқ. "Астана Арена" стадионының қайта жөндеуден өтуіне байланысты елордалық команда осы маусымда Алматыда ойнауға мәжбүр болды.

Мәтіннен қате тапсаңыз, бізге жазыңыз