Футболдан Қазақстан ұлттық құрамасының ойыншысы Бауыржан Исламхан Словенияға қарсы матчтан кейін пікір білдірді. Бұл туралы KAZ.NUR.KZ хабарлайды.
"Әр бапкердің өзіне тән ойыны бар. Біз қазір гол соға алмай жатырмыз. Бірақ біз бір гол соғып кетсек, ары қарай жалғасын табады. Шынына келгенде, біз бастай алмай жатырмыз. Алла қаласа, оның да ауылы алыс емес деп ойлаймын. Келесі ойындарда міндетті түрде гол соғуға тырысамыз", - деді Бауыржан Исламхан.
Сондай-ақ Бауыржан Исламхан ұлттық құраманың соңғы 4 матчта гол соға алмауы туралы мәселе ойыншылар арасында да талқыланатынын айтты. Осыған байланысты Бауыржан Исламхан алдағы ойындарда барын салатынын жеткізді.
Бүгін, 13 қазанда футболдан Қазақстан ұлттық құрамасы УЕФА Ұлттар лигасының 4-туры аясында Словенияға қарсы кездесу өткізді. Алматыдағы Орталық стадионда өткен матчта Қазақстан құрамасы 0:1 есебімен жеңіліс тапты.
Мақаланың түпнұсқасы: https://kaz.nur.kz/sport/football/2173704-nelikten-ulttyq-qurama-songgy-4-oiynda-gol-soga-almai-keledi-bauyrzhan-islamhan-zhauap-berdi/
