УЕФА Чемпиондар лигасы: "Қайрат" футзал клубы "Семейдің" қақпасына 5 гол соғып, жеңіске жетті

Футзалдан УЕФА Чемпиондар лигасының негізгі кезеңі аясында "Қайрат" пен "Семей" клубтары кездесті. Бұл туралы KAZ.NUR.KZ хабарлайды.

Бүгін, 23 қазанда УЕФА Чемпиондар лигасының негізгі кезеңінің 2-туры аясында алматылық "Қайрат" клубы "Семей" командасына қарсы кездесу өткізді. Матч Алматыдағы Балуан Шолақ атындағы спорт сарайында өтті.

Нәтижесінде алматылық "Қайрат" футзал клубы 5:1 есебімен жеңіске жетті. Ойынның есебін "Семей" футзал клубының ойыншысы Ақжол Дәрібай (13-минут) ашты.

Ал "Қайрат" сапынан Эдсон (18), Денер (23), Невеш де Лима (36), Арриета (36), Отана (38) гол соқты.

Турнирдің 1-туры аясында қазақстандық "Семей" футзал клубы португалиялық "Спортинг" командасына 4:6 есебімен есе жіберсе, алматылық "Қайрат" венгриялық "Халадашты" 4:0 есебімен жеңген болатын.

Айта кетейік, "Қайрат" футзал клубы УЕФА Чемпиондар лигасын 2012/2013 және 2014/2015 жылғы маусымында топ жарған.

Ал "Семей" командасы футзалдан Қазақстан чемпионатының 2023/2024 жылғы чемпиондары атанды.

Мәтіннен қате тапсаңыз, бізге жазыңыз