"Қайрат" және "Семей" футзал командаларының УЕФА Чемпиондар лигасы элиталық кезеңіндегі қарсыластары белгілі болды. Бұл туралы KAZ.NUR.KZ ҚФФ-тың Instagram-дағы ресми парақшасына сілтеме жасап хабарлайды.
"Қайрат" элиталық кезеңде B тобында ойнайды. Бұл топта алматылық командаға "Олмиссум" , "Этуаль" және "Динамо" командалары қарсылас болады. B төрттігінің матчтары Хорватияның Загреб қаласында өтеді.
Ел чемпиондары "Семей" элиталық кезеңнің D тобына түсті. Семейліктерден бөлек бұл топта "Пальма" , "Лученец" және "Рекорд" клубтары бар. D тобының ойындары Испанияның Мальорка қаласында өтеді.
УЕФА Чемпиондар лигасының элиталық кезеңі 26 қараша мен 1 желтоқсан аралығында болады. Төрттік финалға әр топтан тек 1 ғана команда шығады.
Айта кетейік, "Қайрат" командасы "Семейді" 5:1 есебімен жеңіп, элиталық кезеңге шыққан болатын. Ал "Семей" футзал клубы венгриялық "Халадасты" 6:1 есебімен ұтып, келесі кезеңге соңғы жолдаманы иеленген еді.
Мақаланың түпнұсқасы: https://kaz.nur.kz/sport/football/2181602-chempiondar-ligasy-qairat-pen-semeiding-elitalyq-kezengdegi-qarsylastary-anyqtaldy/
