27 қарашадан 28 қарашаға қараған түні "Қайрат" пен "Семей" футзал клубтары Чемпиондар лигасының элиталық кезеңіндегі алғашқы матчтарын өткізеді. Бұл туралы KAZ.NUR.KZ хабарлайды.
"Қайрат" футзал клубы франциялық "Этуаль" командасымен кездессе, ал "Семей" испаниялық "Пальмамен" күш сынасатын болады.
Қазақстан уақыты бойынша сағат 00:20-да "Қайрат" пен "Этуаль" ойыны Qazaqstan ұлттық арнасынан тікелей эфирде көрсетіледі. Ал сағат 00:35-те Qazsport арнасынан "Семей" мен "Пальма" арасындағы матчтың тікелей көрсетілімін тамашалауға болады.
Элиталық раундта "Қайрат" В тобында өнер көрсетеді. Алматылық клуб бұл топта хорватиялық "Олмиссум" және "Футзал Динамо" командаларымен шеберлік байқасады. Ал "Семей" D тобында польшалық "Рекорд Бельско-Бяла" мен словакиялық "Мимел Лученецке" қарсы ойындар өткізеді.
Әр топтың жеңімпаздары футзалдан Чемпиондар лигасының финалдық кезеңіне жолдама алады.
Еске сала кетейік, Чемпиондар лигасының негізгі кезеңінде "Қайрат" пен "Семей" бір топта ойнаған болатын. "Қайрат" тоғыз ұпай жинап, топта үздік атанса, "Семей" үш ұпаймен үшінші орынға тұрақтап, элиталық кезеңге жолдама алған еді.
Мақаланың түпнұсқасы: https://kaz.nur.kz/sport/football/2192975-chempiondar-ligasy-bugin-qairat-pen-semei-elitalyq-kezengdegi-matchtaryn-otkizedi/
