Футболдан Қазақстан құрамасының ойыншысы Бақтиер Зайнутдинов 2024/2025 жылғы маусымда алғаш рет түркиялық "Бешікташтың" негізгі құрамында ойнап, нәтижелі пас берді. Бұл туралы KAZ.NUR.KZ тілшісі хабарлайды.
Түркиялық клуб УЕФА Еуропа лигасы жалпы кезеңінің алтыншы туры аясында сырт алаңда норвегиялық "Буде-Глимтпен" ойнады. Зайнутдинов биылғы маусымда алғаш рет "Бешікташтың" негізгі құрамына енді.
Қазақстандық футболшы ойынның 21-минутында Жедсон Фернандешке нәтижелі пас берді. Соның арқасында "Бешікташ" есепте алға шықты. Алайда кейін "Буде-Глимт" сапынан Филип Синкернагель (37) және Один Бертуфт (43) гол соқты. Осылайша норвегиялық команда 2:1 есебімен жеңіске жетті.
"Бешікташ" ұжымы осымен төртінші рет Еуропа лигасының жаңа маусымында жеңілді. Клубтың еншісінде екі жеңіс бар. Бұған дейін команда франциялық "Лионды" (1:0) және швециялық "Мальмоны" (2:1) жеңген. Сырт алаңда "Бешікташ" амстердамдық "Аяксаға" (0:4), ал өз алаңында 1:3 есебімен германиялық "Айнтрах" пен израильдік "Маккабиден" (Тель-Авив) жеңіліп қалды.
Мақаланың түпнұсқасы: https://kaz.nur.kz/sport/football/2199987-natizheli-pas-berdi-zainudtinov-biylgy-mausymda-algash-ret-beshiktashtyng-negizgi-quramynda-oinady/
