"Қазақтың Мессиі" атанған футболшы бес жыл ойнаған клубынан кетті

Еркебұлан Сейдахмет келісімшартының аяқталуына байланысты алматылық "Қайрат" футбол клубынан кетті. Бұл туралы KAZ.NUR.KZ клубтың Instagram-дағы парақшасына сілтеме жасап хабарлайды.

Еркебұлан Сейдахмет "Қайрат" сапына 2019 жылғы жазда қосылған еді. Ол алматылық командада бес маусымда 107 матч өткізіп, 8 гол соғып, 10 нәтижелі пас берді. Командамен бірге Еркебұлан Қазақстан чемпионы әрі ел Кубогының иегері атанды.

"Қайрат" футбол клубы Еркебұланға көп жыл бойы жан-тәнімен ойнағанына алғыс айтады! Болашақ мансабыңда сәттілік тілейміз!", - делінген клуб хабарламасында.

Айта кетейік, 24 жастағы Еркебұлан Сейдахмет жанкүйерлер арасында "Қазақтың Мессиі" атанып кеткен. Ол футболдағы мансабында "Жетісу", "Тараз", болгариялық "Левски" және ресейлік "Уфа" клубтарында ойнаған.

Мәтіннен қате тапсаңыз, бізге жазыңыз