"Сәлем, Астана": бельгиялық "Брюгге" клубының футболшылары Астанаға келді

Бельгиялық "Брюгге" клубының футболшылары Чемпиондар Лигасы аясындағы "Қайрат" командасымен кездесу үшін Астанаға келді. Клуб желідегі парақшасында қазақ тілінде жазба жариялады, деп хабарлайды KAZ.NUR.KZ.

Бельгиялық клуб Instagram желісіндегі парақшасында Астанаға ұшар алдында түскен видеосын жариялады. Онда футболшылар елордаға жеткенше ұшақта не істегендерін көрсетті.

"Сәлем, Астана!" - деп жазылған видео сипаттамасында.

Клуб Астанаға жеті сағатта жеткен.

"Қазақстанға қош келдіңіздер", - деп қарсы алды қазақстандық жанкүйер қонақтарды.

Брюггенің жазбасына пікір қалдырғандар арасында "Қайратты" қолдап, Алматы клубына сәттілік тілегендер де болды.

Бельгиялықтар Астанада түсірген видеоларын да жариялады – спортшылар Қазақстан астанасына келіп, көрікті жерлерін аралап, қаланы тамашалады.

Естеріңізге сала кетейік, "Қайрат" Чемпиондар Лигасындағы соңғы екі ойынын өткізуге дайындалып жатыр. 20 қаңтарда команда "Астана Аренада" Бельгияның "Брюгге" командасын қабылдайды. 28 қаңтарда алматылық команда Лондонда "Арсеналмен" ойнайды.

Мәтіннен қате тапсаңыз, бізге жазыңыз