"Қайрат" "Омонияны" жеңіп, Чемпиондар лигасының үшінші іріктеу кезеңіне шықты

Қазақстандық "Қайрат" футболшылары УЕФА Чемпиондар лигасының 2026/27 маусымы аясында өз алаңында Кипрдің "Омония" командасын жеңді, деп хабарлайды KAZ.NUR.KZ тілшісі.

Командалар екінші іріктеу кезеңінде бақ сынады. Екі матчтан тұратын кездесу Алматыдағы Орталық стадионда өтті. Негізгі уақытта алаң иелері 1:0 есебімен басым түсті.

Жалғыз голды бразилиялық шабуылшы Эдмилсон (37-минут) соқты, оған португалиялық қорғаушы Луиш Мата нәтижелі пас берді. Оған дейін кипрлік форвард Андроникос Какуллис (26-минут) алаңнан қуылған болатын.

Екі ойынның қорытындысы бойынша есеп теңесті – 1:1. Қосымша уақытта жеңімпаз анықталмағандықтан, пенальти сериясы тағайындалды. Бұл ретте қонақтардың командасында малийлік қорғаушы Сену Кулибали (111-минут) алаңнан қуылғанынан кейін тоғыз адам қалды.

Алматылықтар пенальти сериясында 6:5 есебімен жеңіске жетті. Олар өз мүмкіндіктерінің бірін мүлт жібергенімен, Қазақстан құрамасының қақпашысы Темірлан Анарбеков қарсыластардың екі соққысын қайтара алды.

"Қайрат" үшінші іріктеу кезеңіне жолдама алып, онда болгариялық "Левски" (София) немесе румыниялық "Университатя" (Крайова) командасымен кездеседі. Алматылықтар келесі кезеңдегі өз алаңындағы ойынды "Түркістан Аренада" өткізеді, себебі қаланың стадионында Канье Уэсттің концерті өтеді.

Мәтіннен қате тапсаңыз,бізге жазыңыз