Лионель Месси қоштасу матчында гол соғып, Аргентина құрамасына жеңіс сыйлады

Футболдан Аргентина ерлер құрамасы тарихи жолдастық кездесуде өз алаңында Бенин командасын ірі есеппен жеңді, деп хабарлайды KAZ.NUR.KZ тілшісі.

Командалар Буэнос-Айрестегі "Монументаль" стадионында кездесті. Бұл Лионель Мессидің Аргентина құрамасындағы қоштасу матчы болды.

Алаңға капитан ретінде негізгі құрамда шыққан 39 жастағы форвард кездесуді толық өткізді. Ол 3:0 есебімен аяқталған ойында алаң иелерінің әрбір голына атсалысты.

Қорғаушы Николас Отаменди (48-минут) мен жартылай қорғаушы Нико Пас (61-минут) Мессидің пастарын голға айналдырды. Ал ойынның нүктесін пенальтиді сәтті орындаған шабуылшының өзі қойды (71-минут).

Жолдастық кездесудің оныншы минутында Мессиге құрмет көрсету үшін ойын уақытша тоқтатылды. Стадиондағы жанкүйерлер оны қошеметтеп, осы сәтте фейерверк атылды.

Айта кетейік, Месси Аргентина құрамасы сапында 2005 жылғы 17 тамызда дебют жасады. Содан бері ол ұлттық құрама сапында 208 матч өткізіп, 126 гол соқты және 70 нәтижелі пас берді – бұл ел құрамасының абсолютті рекорды.

2022 жылы Месси әлем чемпионы атағын жеңіп алды. Сондай-ақ Аргентина құрамасымен бірге екі рет Америка кубогын (2021, 2024) иеленіп, екі мәрте әлем чемпионатының күміс жүлдегері (2014, 2026) атанды.

Мәтіннен қате тапсаңыз, бізге жазыңыз