Дастан Сәтпаев кезекті матчқа неге шықпады: "Бернли" бас бапкері себебін түсіндірді

Англияның "Бернли" клубының бас бапкері Ники Хайен Қазақстан құрамасының шабуылшысы Дастан Сәтпаевтың "Чарльтонға" қарсы Чемпионшип матчына (2:2) не себепті қатыспағанын түсіндірді. Оның айтуынша, футболшының құқығы тиесілі "Челси" клубы жарақаттан кейінгі қалпына келу кезеңіне байланысты алаңға шығуына рұқсат бермеген, деп хабарлайды 1bol.

Хайеннің сөзінше, лондондық клуб пен "Бернлидің" медициналық қызметкерлері 18 жастағы шабуылшының физикалық жүктемесін бірлесіп бақылап отыр. Сондықтан Сәтпаевтың матчқа қатысуына қатысты соңғы шешімді "Челси" қабылдаған.

"Жоқ, бізге рұқсат бермеді. Дастан ауыр жарақат алғандықтан, "Челси" оның бүгін ойнауына мүмкіндік бермеді. Олар біздің медициналық штабпен бірге оның жүктемесін бақылап отыр. Бірақ бүгін алаңға шыға алмайтынын хабарлады. Ол ұзақ уақыт бойы ойыннан тыс қалды. Дастан әлі де "Челсиге" тиесілі, екі клубтың медициналық қызметтері бірлесіп жұмыс істейді. Бүгін ойнамау туралы шешімді солар қабылдады. Жұма күні ол "Вулверхэмптонға" қарсы ойнайды. Алайда бүгінгі матчқа "Челси" рұқсат берген жоқ", – деді Ники Хайен.

Ники Хайен екі клуб арасындағы келісім бойынша футболшының алаңға шығуға дайындығын "Челси" мамандары да бағалайтынын атап өтті. Оның айтуынша, жарақаттан кейінгі кезеңде медициналық қызметтердің бірлесіп жұмыс істеуі алдын ала келісілген шарттардың бірі болған.

Сонымен қатар бапкер Сәтпаевтың шабуылдағы мүмкіндіктеріне тоқталды. Ол қазақстандық футболшының "Уотфордқа" қарсы кездесуде қосалқы құрамнан шыққанын еске алып, оның командаға шабуылда қосымша мүмкіндік беретінін айтты.

"Әрине, бұл жағымсыз жағдай. Өйткені Дастан "Уотфордқа" қарсы матчта алаңға қосылғанда, шабуылдағы таңдауымызды арттырғанын көрдік. Ол Андреас Унтонжиден мүлде бөлек ойыншы. Дастан шабуылға жылдамдық, техникалық шеберлік және әртүрлілік қосады", – деді "Бернли" бапкері.

Хайеннің айтуынша, Сәтпаевтың алаңға оралуына қатысты жағдай апта сайын өзгеріп отырады. Дегенмен команда футболшының қалпына келуіне байланысты жұмысын жалғастырып жатыр.

Осылайша, қазақстандық шабуылшының келесі ойыны 16 қазанда «Вулверхэмптонға» қарсы өтетін матч болуы мүмкін. Алайда оның алаңға шығуы медициналық рұқсатқа байланысты болады.

Мәтіннен қате тапсаңыз, бізге жазыңыз