Роналду хет-трик жасап, мансабындағы 1000 гол межесіне жақындады

Португалиялық шабуылшы, "Аль-Наср" ойыншысы Криштиану Роналду Сауд Арабиясы чемпионатында "Аль-Холуд" қақпасына үш доп соқты, деп хабарлайды KAZ.NUR.KZ.

Португалиялық шабуылшы үш голды да екінші таймда, 15 минут ішінде соқты. Енді оның еншісінде 985 гол бар, мыңдық межеге жету үшін 15 гол қалды.

Нәтижелі матч 5:3 есебімен аяқталды.

Матчта "Аль-Холуд" командасының ойыншысы Жюльен Домингес 16-минутта есеп ашты. "Аль-Наср" тарабынан бұған Габриэл Анжело мен Садио Мане соққан голдармен жауап берді, алайда үзіліске дейін Лоик Эссомба 2:2 есебімен таразы басын теңестірді.

Екінші таймда кездесу тағдырын Роналду шешті. 66-минутта ол өз командасын алға шығарды, 72-минутта басымдықты арттырды, ал 81-минутта хет-трик жасады. Португалиялық футболшы ойынды төрт голмен аяқтай алар еді, бірақ оның бірінші таймда соққан голы офсайд салдарынан есепке алынбады.

Қосылған уақытта Домингес пенальтиді сәтті орындап, қорытынды есепті орнатты – 5:3 "Аль-Насрдың" пайдасына.

Осы маусымда Роналду он матчта жеті гол соқты. Сұрмергендер тізімдерінде ол "Аль-Кадисиядан" Матео Ретегимен бірге үшінші орынды бөлісіп тұр.

Қазіргі чемпион "Аль-Наср" соғылған және жіберілген доптар айырмасы бойынша "Аль-Кадисияға" есе жіберіп жатыр. Бәсекелес команда "Аль-Риядты" 6:0 есебімен ойсырата жеңді – бұл кездесуде Рейндерс хет-трик жасады.

Мәтіннен қате тапсаңыз, бізге жазыңыз