Финляндияда өтіп жатқан шайбалы хоккейден жасөспірімдер арасындағы әлем чемпионатында Қазақстан құрамасы топтағы алғашқы жеңісіне қол жеткізді. Бұл туралы KAZ.NUR.KZ Қазақстан хоккей федерациясының ресми сайтына сілтеме жасап хабарлайды.
Қазақстан құрамасы B тобында Чехия командасымен кездесіп, овертаймда 4:3 есебімен басым түсті. Осылайша, отандастарымыз алғаш рет жасөспірімдер арасындағы әлем чемпионатының элиталық дивизионында жеңіске жетіп, тарихи жетістікке қол жеткізді.
Роман Большедворский Қазақстан құрамасы сапындағы үздік ойыншы деп танылды. Ол матчтың алғашқы шайбасын соқты. Сондай-ақ нәтижелі паспен көзге түсті.
Енді қазақстандық хоккейшілер бүгін, 30 сәуірде Канадаға қарсы ойнайды. Матч Астана уақытымен сағат 21:00-де басталады.
Қазір В тобында Канада 3 матчтан кейін 9 ұпаймен алда тұр. Чехияда – 6, Швецияда – 4, Швейцарияда – 3, Қазақстанда 2 ұпай бар.
Мақаланың түпнұсқасы: https://kaz.nur.kz/sport/hockey/2093456-hokkeiden-qazaqstan-quramasy-alem-chempionatynda-tarihi-zhetistikke-qol-zhetkizdi/
