"Барыс" хоккей клубы тағы 3 легионермен келісімшартын тоқтатты

"Барыс" хоккей клубы тағы 3 легионермен келісімшартын тоқтатқанын мәлімдеді. Бұл туралы KAZ.NUR.KZ клубтың Instagram желісіндегі ресми парақшасына сілтеме жасап хабарлайды.

Елордалық "Барыс" хоккей клубы қорғаушылар Натан Больё мен Уилл Бутчер, сондай-ақ шабуылшы Майкл Маклаудпен келісімшартын үзгенін мәлімдеді. Бұл шешім клуб тарапынан қабылданды. Келісімшартты бұзғаны үшін "Барыс" хоккей клубы 3 легионерге өтемақы төлейді.

"Барыс" ойыншыларға клубта өткізген уақыты үшін алғыс білдіріп, болашақ мансабында сәттілік тілейді", - делінген клубтың мәлімдемесінде.

Айта кетейік, осы үш ойыншы да жазда "Барыс" құрамына қосылған болатын. Натан Больё ҚХЛ-дың тұрақты чемпионатында 8 ойын өткізіп, бір нәтижелі паспен көзге түсті. Уилл Бутчер 15 ойында 3 пас берсе, ал Майкл Маклауд 16 кездесу өткізіп, 6 (3+3) ұпай жинаған.

Сондай-ақ "Барыс" хоккей клубының жаңа бас директоры Нұрлан Оразбаев баспасөз мәслихатында барлық америкалық легионермен келісімшартты бұзғанын мәлімдеген болатын.

Мәтіннен қате тапсаңыз, бізге жазыңыз