"Жас емеспін": Жасұлан Әкімжан қазақстандық файтерлермен жекпе-жекке неге шыққысы келмейтінін айтты

MMA шебері Жасұлан Әкімжан қазақстандық файтерлермен жекпе-жекке неге шыққысы келмейтінін айтты. Бұл туралы KAZ.NUR.KZ Naiza лигасының Youtube-тағы ресми арнасына сілтеме жасап хабарлайды.

Жасұлан Әкімжан қарсылас таңдап беретін матчмейкерлерге өтінішін жеткізді.

"Неге екені белгісіз, маған 2-0, 3-0 деген статистикасы бар файтерлерді беретін болыпты. Неге? Оларды ұтқанымнан маған келіп-кетер пайда жоқ. Жеңілсем, сынға ұшыраймын. Оданда 10-0 деген статистикасы бар жігіттерді әкеліңдерші. Жеңсем, өзіме жақсы. Ұтылып қалсам, ештеңе етпейді. Бұл – спорт.

Маған қазақстандық файтерлерді мүлде бермеуді ұсынамын. Мәселен, Ресейде небір мықты жігіттер бар. Мықтылармен төбелесуім керек деп ойлаймын. Менімен деңгейлес немесе менің деңгейімнен жоғары жігіттермен жекпе-жекке шыққаным жөн. Өйткені өзімді дәлелдеуім қажет, жас емеспін", – деді Жасұлан Әкімжан.

Еске салайық, Жасұлан Әкімжан соңғы рет 2023 жылы желтоқсанда Naiza 55 турнирінде жекпе-жекке шығып, Франция өкілі Джейсон Понеден жеңіліп қалған еді.

Мәтіннен қате тапсаңыз, бізге жазыңыз