UFC рейтингі жаңарды: Шавкат Рахмонов пен Асу Алмабаев нешінші орында тұр

Бүгін, 5 қарашада UFC промоушенінің барлық салмақ дәрежесіндегі рейтингі жаңартылды. Бұл туралы KAZ.NUR.KZ UFC-дің ресми сайтына сілтеме жасап хабарлайды.

Шавкат Рахмонов жартылай орта салмақтағы рейтингте үшінші орында қалды. Ал бірінші орында Леон Эдвардс, екінші сатыда Камару Усман тұр. Бұл дивизионда чемпиондық титул иегері – Белал Мухаммад.

Асу Алмабаев ең жеңіл салмақ дәрежесі рейтингінде әлі де жетінші орында тұр. Мұндағы топ-3 файтер Брэндон Ройвал, Брэндон Морено және Амир Альбази. Ал чемпиондық титул Алешандре Пантожаға тиесілі.

Айта кетейік, Шавкат Рахмонов 7 желтоқсанда Белал Мухаммадпен титулды жекпе-жекке шығуы керек болатын. Алайда америкалық файтер ауруханаға түсіп қалып, кездесуден бас тартты. Рахмонов соңғы жекпе-жегін 2023 жылы желтоқсанда өткізіп, АҚШ спортшысы Стивен Томпсонды екінші раундта ұтқан болатын. Қазақстандық файтер MMA-да 18 рет, UFC-де 6 рет жеңіске жеткен.

Асу Алмабаев биыл қазанда бразилиялық файтер Матеус Николауға қарсы жекпе-жек өткізіп, төрешілердің бірыңғай шешімімімен басым түсті. Осылайша кәсіби мансабындағы 21, ал UFC-дегі 4-жеңісіне қол жеткізген еді.

Мәтіннен қате тапсаңыз, бізге жазыңыз