Асу Алмабаев UFC-дегі келесі жекпе-жегін қашан өткізгісі келетінін айтты

UFC промоушенінде өнер көрсететін қазақстандық файтер Асу Алмабаев келесі жекпе-жегін қашан өткізгісі келетінін айтты. Бұл туралы KAZ.NUR.KZ Prosports.kz сайтына сілтеме жасап хабарлайды.

"Мен Рамазан айына дейін бір жекпе-жек өткізу үшін ақпанның ортасында немесе соңында жұдырықтасқым келеді. Содан кейін қасиетті оразаны алаңсыз ұстауға болады", - деді Алмабаев.

Тағы бір қазақстандық файтер Азат Мақсұмды жеңген америкалық файтер Чарльз Джонсон Асу Алмабаевпен жекпе-жекке шыққысы келетінін мәлімдеген еді. Бұл ұсынысқа Алмабаев қалай қарайтынын айтты.

"Егер Джонсонмен жекпе-жекке шығарса, әрине, келісеміз. Мен ешқашан бас тартпаймын. UFC берген бүкіл жекпе-жекті қабылдадым, рейтингке де қарамадым. Бірақ қазіргі уақытта мен рейтингте жетінші орында тұрмын және Ройвелмен кездескім келеді. Десе де маған бәрібір", - деді қазақстандық файтер.

Еске салайық, Асу Алмабаев соңғы рет октагонға қазанда шығып, АҚШ-тың Лас-Вегас қаласында өткен UFC Fight Night 245 турнирінде өнер көрсеткен еді. Ол бразилиялық файтер Матеус Николауды төрешілердің бірыңғай шешімімен ұтып, UFC-де төртінші рет жеңіске жетті.

Мәтіннен қате тапсаңыз, бізге жазыңыз