Ресми: Ислам Махачев пен Арман Царукян арасындағы жекпе-жек уақыты белгілі болды

UFC президенті Дана Уайт жеңіл салмақтағы чемпион Ислам Махачевтің рейтингте бірінші орында тұрған Арман Царукянға қарсы жекпе-жегін ресми түрде жариялады. Бұл туралы KAZ.NUR.KZ UFC-дің Instagram-дағы парақшасына сілтеме жасап хабарлайды.

Жеңіл салмақтағы қос спортшының жекпе-жегі келесі жылы 18 қаңтарда өтеді және Лос-Анджелестегі (АҚШ) UFC 311 турнирінің басты оқиғасы болады. Махачев жеңіл салмақтағы чемпиондық атағын төртінші рет қорғамақ. Ол Царукянмен екінші рет күш сынасқалы отыр.

Махачев пен Царукянның алғашқы жекпе-жегі 2019 жылдың сәуірінде UFC Fight Night 149 турнирінде өтті және Махачевтің жеңісімен аяқталған еді. Царукян аралас жекпе-жегіндегі мансабында 22 рет жеңіске жетіп, 3 мәрте жеңілген. Ал Махачевтің рекорды – 26-1.

Cондай-ақ UFC 311 турнирінде чемпиондық жекпе-жек болады. Ең жеңіл салмақтағы титул иегері Мераб Двалишвили бірінші рет белбеуін дивизиондағы екінші нөмірлі спортшы Умар Нурмагомедовке қарсы кездесуде қорғайды. Хабиб Нурмагомедовтың немере інісі Умар биыл наурызда қазақстандық Бекзат Алмаханға қарсы жекпе-жек өткізіп, жеңіске жеткен болатын.

Мәтіннен қате тапсаңыз, бізге жазыңыз