Ресми: Асу Алмабаев UFC-дің жаңартылған рейтингінде төмендеді

Қазақстандық жауынгер Асу Алмабаев UFC-дің аса жеңіл салмақтағы жаңартылған рейтингінде бір саты төмендеді. Бұл туралы KAZ.NUR.KZ UFC-дің ресми сайтына сілтеме жасап хабарлайды.

UFC өзінің ресми сайтында барлық салмақ дәрежелері бойынша жаңартылған рейтингін жариялады. Аса жеңіл салмақта өнер көрсететін қазақстандық жауынгер Асу Алмабаев рейтингте бір сатыға төмендеп, 8-орынға жайғасты.

Бұл дивизиондағы өзгерістер UFC on ESPN 63 турнирінде Манел Кейптің жеңісінен кейін болды. Португалиялық Манел Кейп осы жеңісінің арқасында бірден үш сатыға көтеріліп, қазіргі таңда 6-орынға тұрақтады.

Ал осы салмақта бразилиялық жауынгер Александр Пантожа рейтингте көш бастап тұр.

Сондай-ақ Шавкат Рахмонов өнер көрсететін жартылай орта салмақта да өзгерістер орын алды. Америкалық Хоакин Бакли 9-орыннан 6-орынға көтерілсе, оның қарсыласы Колби Ковингтон 9-орынға төмендеді.

Ал Шавкат Рахмонов бұл дивизионда 2-орынға табан тіреген. Ал америкалық-палестиналық файтер Белал Мухаммад жартылай орта салмақтың көш басында тұр.

Айта кетейік, Асу Алмабаев UFC-дегі дебютін 2023 жылдың тамыз айында Одди Осборнды тұншықтыру әдісімен жеңіп бастаған болатын. Биыл ол бірінен кейін бірін СиДжей Вергараны, Хосе Джонсонды және Матеус Николауды төрешілердің бірыңғай шешімімен жеңді.

Мәтіннен қате тапсаңыз, бізге жазыңыз