"Оп-оңай жеңеді": Нұрқожа Қайпанов файтер Шавкат Рахмоновтың UFC чемпионына қарсы мүмкіндігін бағамдады

Еркін күрестен әлем чемпионы Нұрқожа Қайпанов қазақстандық жауынгер Шавкат Рахмоновтың UFC чемпионы Белал Мухаммадқа қарсы жекпе-жегі туралы пікір білдірді. Бұл туралы KAZ.NUR.KZ Sportnews.kz сайтына сілтеме жасап хабарлайды.

"Шавкат – жан-жақты спортшы. Ол бокста да, күресте де басымдыққа ие. Менің ойымша, Шавкат Белал Мухаммадты оп-оңай жеңеді. Иэн Гэрриге қарсы жекпе-жекте кейбір қиындықтар болғаны белгілі. Соған қарамастан, Шавкат өз шеберлігін толық көрсетті және жеңісті қолдан бермеді. Шавкат – мықты спортшы. Мен оның Қазақстанның атын әлемге танытып, туымызды көтеретініне сенімдімін", - деді Нұрқожа Қайпанов.

Шавкат Рахмонов қазіргі уақытта UFC-дің жартылай орта салмақ дәрежесіндегі рейтингінде екінші орында тұр. Ал палестиналық-америкалық Белал Мухаммад осы салмақтағы рейтингте көш бастап тұр.

Естеріңізге сала кетейік, Шавкат Рахмонов бастапқыда UFC 310 турнирінде жартылай орта салмақтағы UFC чемпионы Белал Мухаммадпен титулдық жекпе-жекке шығуы керек еді. Бірақ Белал Мухаммад инфекция жұқтырып алып, кездесу өтпейтін болды.

Мәтіннен қате тапсаңыз, бізге жазыңыз