"Анашымның қуанғаны қатты әсер етті": Он жылдан соң медаль алған Дәулет Шабанбай ерекше сезімімен бөлісті

Еркін күрес шебері Дәулет Шабанбай Лондон Олимпиадасының қола жүлдегері атанды. Араға он жыл салып Олимпиада медалін алған ол бұл жеңісіне кімнің қатты қуанғанын айтты, деп хабарлайды Bassport.kz сайтына сілтеме жасаған KAZ.NUR.KZ.

Белградтан жеткен сүйінші хабар жанкүйерлерді, оның ішінде, балуанның анасын қатты қуантқан.

"Қазіргі сезімді сөзбен жеткізу мүмкін емес. Ең әдемі сезім – анашымның осы медальді алғанымды көріп, қатты қуанып, ырза болып отырғаны. Бақыты шексіз анамның. Анамның қуанғанын көріп, мен де балаша қуанудамын. Барша қазақ балуандарын тек өзіне сенуге шақырамын. Өйткені, саған берілген, бұйырған нәрсе ешқашан кетпейді екен. Негізі осыдан жарты жыл бұрын ресми түрде марапаттайтынын естідім. Осы сәтті күттім", – дейді Дәулет.

Спорттық мансабын аяқтаған Шабанбай өзінің ересектермен, ұлттық құрамамен жұмыс істегісі келетінін жасырған жоқ.

"Егер кіргізіп жатса, ұлттық құрама жігіттерін дайындағым келеді. Ал кейін өзімнің залымды ашсам, жас балуандарды тәрбиелесем деген мақсатым бар. Бірақ мен күрес залына он жастағы балаларды ғана таңдап аламын. Он жасқа дейін балалар ойнап, ойынын қандырып, алаңсыз, балалықтың дәмін татып өсуі керек. Әке-шешесі тәрбиелеп, рухани түрде дамытса баланы, одан мықты адам шығады", – дейді балуан.