"Жеңіс те, жеңіліс те бар": 2022 жылы қазақстандық спортшылар қандай жетістігімен көзге түсті

Санаулы күндерден соң 2022 жыл да тарих қойнауына кетеді. Биылғы маусым қазақстандық спортшылар үшін жеңіске де, жеңіліске де толы болды. Осы орайда, KAZ.NUR.KZ жылдың үздік спорттық оқиғаларын назарларыңызға ұсынады.

Бейжіңнен құр қол қайттық

2022 жылдың басты спорттық жарыстарының бірі - Бейжіңдегі қысқы Олимпиада ойындары. Аталған сынға Қазақстан құрамасы сапынан 34 спортшы қатысты. Олардың қатарында Пхенчхан Олимпиадасының жүлдегері, әлем чемпионы Юлия Галышева да болған. Өкінішке қарай, қазақстандықтар екі олимпиадалық циклде жалғасқан дәстүрді жалғастыра алған жоқ. Медальға қол созым жерден тоқтаған Абзал Әжіғалиевті ғана ерекшелеп айта аламыз. Ол отандық спортшылар арасынан ең жоғарғы нәтиже тіркеп, шорт-тректен 500 метрге жүгіруден төртінші орын иеленді. Спортшыларымыз жүлдесіз қалса да, Қазақстан командасының ашылу салтанатында киіп шыққан киімі әлемдік БАҚ назарына ілігіп, көпшіліктің көңілінен шықты.

"Үлкен дулыға" турниріндегі алғашқы жеңіс

2022 жыл Қазақстан теннисінің тарихында алтын әріптермен жазылады. Себебі біздің елдің өкілі "Үлкен Дулыға" турнирлерінде алғаш рет жеңіске жетті. Англияның ашық біріншілігі "Уимблдон" турнирінде қазақстандық Елена Рыбакина топ жарды. Ол финалда әлемнің сол кездегі екінші ракеткасы, тунистік Онс Жаберді үш сет қорытындысы бойынша ұтты. Ал турнир барысында Коко Вандева, Бьянка Андрееску, Чжэн Циньвэнь, Петра Мартич, Айла Томлянович, Симона Халем сынды әлем мықтыларын тізе бүктірді. Бұл жекелей сында қазақстандық теннисшілер жеңіп алған алғашқы ірі жүлде.

Кениялық қыздың Қазақстанға тартуы

АҚШ-та өткен жеңіл атлетикадан әлем чемпионатында Қазақстан тарихы тағы жаңарды. Елімізге келген легионер спортшылардың бірі Нора Джерута 3000 метрге кедергілер арқылы жүгіруден әлем чемпионы атанды. Бұл қазақстандық атлеттердің әлем чемпионатында алғаш рет топ жаруы. Бірақ спортшының жеңісін отандық жанкүйерлер әрқилы қабылдады. Көпшілігі желаяқтарды шетелден әкелуге қарсы болған.

Федоровтан бір алтын

Австралияда өткен тас жолдағы веложарыстан әлем чемпионатында Қазақстан қоржыны тағы бір алтынмен толықты. 23 жасқа дейінгі спортшылар арасында өнер көрсеткен Евгений Федоров топтық кезең жеңімпазы атанды. Ол мәреге жақындағанда чехиялық Марек Вачек пен норвегиялық Серен Вереншельдті артта қалдырған. Осылайша, Федоров әлем чемпионатының алтынын алған екінші қазақстандық велоспортшы атанды. 2012 жылы бұл жетістікке Алексей Луценко қол жеткізген еді.

Дзюдо мен күрес: әзірге алтын жоқ

Сондай-ақ қазақстандық балуандар биылғы әлем чемпионаттарында өнер көрсетті. Грек-рим күресінен Айдос Сұлтанғали, еркін күрестен Азамат Дәулетбеков әлем біріншілігінің қола жүлдегерлері атанды. Әйелдер күресінен Жәмила Бақбергенова қатарынан екі рет әлем чемпионатының күмісін иеленді. Әзірге балуандарда алтын жүлде жоқ.

Дзюдодан Ташкентте өткен әлемдік сында Елдос Сметов пен Абиба Әбужақынова қола жүлдегер атанды. Екеуі де жеңіл салмақта сынға түскен болатын. Елдос әлем біріншілігіндегі үшінші жүлдесін жеңіп алса, Абиба қазақ қыздары арасынан әлем чемпионатында жүлде алған алғашқы спортшы ретінде тарихта қалды.

"Головкин - Альварес" текетіресі аяқталды

Геннадий Головкин мен мексикалық Сауль "Канело" Альварес арасындағы үшінші жекпе-жекке биыл нүкте қойылды. Ешкімнен жеңіліп көрмеген Головкин мексикалық қарсыласын ұта алмады. Алғашқы кездесу тең аяқталып, екінші жекпе-жекте Альварес жеңіске жеткен еді. Өкінішке қарай, әлем жанкүйерлері асыға күткен үшінші кездесу де Саульдің еншісіне аяқталды. Головкин мансабына қатысты ешқандай мәлімдеме жасаған жоқ. Белгілісі - отандық жанкүйерлердің оған деген махаббаты ортаймайды.

Ұлттар лигасында көш бастадық

Футболдан Қазақстан құрамасы да биыл жанкүйерді ерекше қуантты. Отандық футболшылар Ұлттар лигасындағы үшінші дивизионның С тобында көш бастады. Қазақстандықтар турнир барысында Әзірбайжан, Словакия және Беларусь құрамаларынан басым түсті. Қазақ футболының тарихында мұндай жетістік әлі болмағанын айта кеткен жөн. Енді футболшылар келесі айналымның жеребесі тартылатын күнді асыға күтуде.

Аланның аяқ алысы

Үстел теннисінен Қазақстан тарихында тұңғыш рет Алан Құрманғалиев әлем чемпионы атанды. Қарағандылық спортшы Тунисте өткен жасөспірімдер арасындағы әлем чемпионатында жұптық сын бойынша алтын медаль иеленді.

Ал жекелей сында қоланы қанағат тұтты. Сондай-ақ Алан үстел теннисінен Азия чемпионатының қоласын иеленген алғашқы қазақстандық екенін де ұмытпаған жөн.