Жеңіл атлетикадан Таиланд астанасы Бангкокте өтіп жатқан Азия чемпионатында Қазақстан қоржынына алғашқы медаль түсті. Бұл туралы отандық федерацияға сілтеме жасаған KAZ.NUR.KZ хабарлайды.
Ерлер арасында 10 мың метрге жарысудан Қазақстан намысын қорғайтын Шедрак Коеч күміс жүлдегер атанды.
Шедрак аталған қашықтықты 29 минут 31,63 секундта жүгіріп өтті. Бұл сында алтын медальді жапониялық Рен Тазава, қоланы үндістандық Абхишек Палу иеленді.
22 жастағы Шедрак Коеч Кенияның тумасы. Ол Қазақстан құрамасына ауысып, өзінің алғашқы тырнақалды табысына қол жеткізіп отыр.
Бұған дейін ол Нидерландтағы жартылай марафонға қатысқан болатын. Коеч әлемдік жарыстарда Қазақстанға жүлде сыйлаған екінші африкалық атлет. Бұған дейін Нора Джеруто әлем чемпионы атанған еді.
Бангкоктегі Азия чемпионаты 12-16 шілде аралығында өтіп жатыр.
Мақаланың түпнұсқасы: https://kaz.nur.kz/sport/other-sports/2028483-tagy-bir-afrikalyq-zelayaq-qazaqstanga-aziya-cempionatynyn-zuldesin-syilady-video/
