Қазақстандық теннисші Александр Бублик әлемдік рейтингте жоғарылады

Қазақстанның ерлер арасында бірінші ракеткасы Александр Бублик Кәсіби теннисшілер қауымдастығының (ATP) жаңартылған рейтингінде бір сатыға көтерілді. Бұл туралы KAZ.NUR.KZ ATP ұйымының ресми сайтына сілтеме жасап хабарлайды.

Аталған рейтингте Александр Бублик 32-орыннан 31-орынға жоғарылаған. Осылайша ол үздік 30 теннисшінің қатарына енуге жақындады.

Сербиялық теннисші Новак Джокович рейтингтегі бірінші орынын сақтап қалған. Екінші орынға испаниялық Карлос Алькарас жайғасса, үздік үштікті ресейлік Даниил Медведеев түйіндеп тұр.

Қазақстандық теннисшілерден Денис Евсеев те рейтингтегі орнын жақсартты. Ол 190-орыннан 184-орынға көтерілді. Сөйтіп Денис отандасы Бейбіт Жұқаевты (188-орын) басып озып, Қазақстанның екінші ракеткасы атанды. Тимофей Скатов 6 сатыға төмендеп, 228-орынға табан тіреді. Ал Михаил Кукушкин екі сатыға жоғарылап, 262-орынды иемденді.

Жұптық рейтингте Александр Недовесов 46-орынға, Андрей Голубев 62-орынға түсіп қалды.

Мәтіннен қате тапсаңыз, бізге жазыңыз