Әйелдер арасында Қазақстанның екінші ракеткасы Юлия Путинцева "Үлкен дулыға" турнирінің жекелей сынында жеңіліп, жарыс жолынан шығып қалды. Бұл туралы KAZ.NUR.KZ тілшісі хабарлайды.
WTA рейтингінде 64-орындағы қазақстандық теннисшінің қарсыласы осы рейтингтің 190-орнындағы ресейлік Анастасия Захарова болды. Бұл спортшылар үшін екінші кездесу. Ал 2023 жылдың ақпанында өткен бірінші ойында Юлия Путинцева жеңген еді.
Путинцева бірінші сетте 6:2 есебімен жеңсе, екінші сетте 0:6 есебімен ойсырай жеңілді. Ал соңғы шешуші сет Захарованың жеңісімен аяқталды. Осылайша қазақстандық теннисші "Үлкен дулыға" турнирінің бірінші айналымынан-ақ жеңіліп, жарыс жолынан шығып қалды.
Еске салайық, ертең турнирде әлемнің үшінші ракеткасы, Қазақстан ұлттық әйелдер құрамасының көшбасшысы Елена Рыбакина өнер көрсетеді. Ойын Астана уақыты бойынша сағат 14:00-де басталады.
Мақаланың түпнұсқасы: https://kaz.nur.kz/sport/other-sports/2055545-tennissi-yuliya-putinceva-australiyadagy-turnirde-zenilis-tapty/
