Australian Open: Елена Рыбакина ресейлік қарсыласынан жеңіліп қалды

Қазақстандық теннисші Елена Рыбакина Australian Open турниріндегі кезекті ойынында жеңіліске ұшырады. Бұл туралы KAZ.NUR.KZ тілшісі хабарлайды.

Аустралия ашық чемпионатының екінші айналымында Елена Рыбакина әлемнің 57-ракеткасы, Ресей өкілі Анна Блинковамен шеберлік байқасты. Алғашқы сетте қазақстандық теннисші қарсыласына есе жіберді (4:6). Екінші партияда Елена алға шығып, 6:4 есебімен басым түсті. Үшінші сетте есеп 6:6 болғанымен, тай-брейкте Анна Блинкова жеңіске жетті (20-22).

Енді Анна Блинкова келесі ойынын италиялық теннисші Жасмин Паолиниге қарсы өткізеді.

Еске салайық, Елена Рыбакина Australian Open турнирін жеңіспен бастаған еді. Ол бірінші айналымда чехиялық теннисші, әлемнің 38-ракеткасы Каролина Плишковадан басым түсті (7:6, 6:4).