Денсаулығына байланысты Париж Олимпиадасына қатыса алмаған қазақстандық теннисші Елена Рыбакина мәлімдеме жасады. Бұл туралы KAZ.NUR.KZ Қазақстан теннис федерациясына сілтеме жасап хабарлайды.
Елена Рыбакина өкпенің қабынуы ауруына шалдығып, Париж Олимпиадасына қатыса алмаған еді. Дәрігерлер оған жарыс алаңына шығуға рұқсат бермеген.
"Құрметті жанкүйерлер, Отандастарым! Сіздерге Париждегі Олимпиада ойындарында Қазақстан құрамасы сапында өнер көрсете алмағаныма өзімнің қаншалықты ренжігенімді және өкінетінімді айтып хабарлаймын.
Мен командамен бірге белсенді дайындалдым, өкінішке орай, дәл жарыс басталар алдында сырқаттанып қалдым. Дене қызуым қатты көтеріліп, тыныс алуым да қиын болды, дәрігерлер маған кортқа шығуға қатаң тыйым салды. Барлық қазақстандық жанкүйерлерден ақталмаған үміттеріңіз үшін кешірім сұрағым келеді. Бұл жағдай жүрегіме өте қатты тиді, өйткені мен өз командаммен осы Олимпиада ойындарында жақсы нәтижеге қол жеткізу үшін көп жұмыс істегенмін және медаль жеңіп алғым келді.
Токиода өткен Олимпиадада мен медаль алуға өте жақын болдым және медаль алу менің үлкен мақсатым болып қала берді. Мен жақын арада кортқа шыға аламын деп үміттенемін. Барлық отандастарыма алғысымды жеткізгім келеді, өйткені әлемнің қай түкпірінде ойнасам да сіздер маған әрқашан айтарлықтай қолдау көрсетесіздер. Стадиондарда көк байрағымызды көріп әрқашан қуанамын. Көп рахмет және кортқа жақын арада ораламын деп үміттенемін", - деді Рыбакина.
Айта кетейік, қазақстандық теннисшілер Париж Олимпиадасында бірде-бір жүлде иелене алмады. Александр Бублик пен Александр Шевченко жекелей сында алғашқы айналымнан сүрінді. Кейін жұптық сында Александр Бублик пен Александр Недовесов бірінші матчта бразилиялықтарға есе жіберді.
Сондай-ақ тағы бір қазақстандық теннисші Юлия Путинцева тізе жарақатына байланысты Олимпиадаға қатысқан жоқ.
Мақаланың түпнұсқасы: https://kaz.nur.kz/sport/other-sports/2142472-bul-zhagdai-zhuregime-ote-qatty-tidi-elena-rybakina-malimdeme-zhasady/
