Қазақстандық гимнаст Париж Олимпиадасының финалында соңғы орын алды

Спорттық гимнастикадан Қазақстан құрамасының мүшесі Милад Карими Париж Олимпиадасының финалында өнер көрсетті. Бұл туралы KAZ.NUR.KZ тілшісі хабарлайды.

Милад Карими жекелей көпсайыста бақ сынап, 76.065 ұпай жинады. Ол әр жаттығуда төмендегідей нәтиже көрсетті:

• Еркін жаттығу – 13.433;
• Тұтқалы ат жаттығуы – 8.533;
• Шығыршықтағы жаттығу – 12.933;
• Қол тіреп секіру – 14.400;
• Қоссырықтағы жаттығу – 14.066;
• Керме жаттығуы – 12.700.

Жарыс нәтижесінде қазақстандық гимнаст соңғы – 24-орынға табан тіреді. Алтын медальді жапониялық Шинносуке Ока (86.832) иеленсе, күмісті Қытай спортшысы Бохэнь Чжан (86.599), ал қола жүлдені тағы бір қытайлық Сяо Жотэн (86.364) еншіледі.

Айта кетейік, Милад Карими 4 тамызда қол тіреп секіруден финалда сынға түседі. Сол күні оның командаласы Нариман Құрбанов ат снаряды жаттығуында алтын медальға таласады.

Милад Карими Токио-2020 Олимпиадасына да қатысып, еркін жаттығудан 5-орын, кермеде жаттығудан 8-орын, ал көпсайыстан 14-орын алған еді.