Спорттық гимнастикадан Қазақстан құрамасының мүшесі Нариман Құрбанов Париж Олимпиадасының күміс жүлдегері атанды. Бұл туралы KAZ.NUR.KZ тілшісі хабарлайды.
Нариман Құрбанов тұтқалы ат жаттығуының ақтық кезеңінде 15,433 ұпай жинап, екінші орын алды. Алтын жүлдені ирландиялық Рис МакЛенаган (15,533) жеңіп алса, қола медальді америкалық Стивен Недорошик (15,300) еншіледі.
Осылайша, Нариман Құрбанов спорттық гимнастикадан Олимпиада ойындарында жүлде иеленген тұңғыш қазақстандық спортшы атанды.
Бұл – Париж Олимпиадасында Қазақстан қоржынына түскен төртінші медаль. Осыған дейін нысана көздеуден Александра Ле мен Ислам Сәтбаев аралас командалық сында бақ сынап, қола жүлде еншілеген еді. Ал дзюдошы Елдос Сметов алтыннан алқа тақса, тағы бір татами шебері Ғұсман Қырғызбаев қола жүлдені қанжығалаған болатын.
Еске салайық, қазақстандық гимнаст Милад Карими еркін жаттығудың ақтық кезеңінде 14,500 ұпай жинап, 8 спортшының ішінде 5-орынға тұрақтаған еді.
Мақаланың түпнұсқасы: https://kaz.nur.kz/sport/other-sports/2143467-qazaqstandyq-gimnast-parizh-olimpiadasynyng-kumis-zhuldegeri-atandy/
