Жеңіл атлетикадан Қазақстан құрамасының мүшесі Давид Ефремов Париж Олимпиадасының жартылай финалына тікелей жолдама ала алмады. Бұл туралы KAZ.NUR.KZ тілшісі хабарлайды.
Давид Ефремов 110 метрге кедергілер арқылы жүгіру сайысының іріктеу кезеңінде сынға түсті. Қазақстандық спортшы өз тобындағы сегіз атлеттің ішінде мәреге жетінші болып келді. Оның көрсеткіші – 13,88 секунд.
Осылайша, Ефремов жартылай финалға тікелей жолдама алған үштіктің қатарына кіре алмады. Енді ол жұбаныш кезеңіне қатысып, келесі кезеңге өтуге тағы талпынып көреді.
Бұған дейін қазақстандық жеңіл атлет Нора Джеруто 3000 метрге кедергімен жүгіру сайысының финалына жолдама алғанын жазған едік. Дәл осы сайыста бақ сынаған оның командаласы Дэйзи Джепкемей 10-орын алып, ақтық кезеңге өте алмай қалды.
Сондай-ақ Ольга Сафронова 200 метрге жүгіру сайысының іріктеу кезеңінде мәре сызығын соңғы болып кесіп, жартылай финалдан шет қалған еді.
Әзірге Қазақстан қоржынында Париж Олимпиадасының 1 алтын, 1 күміс және 2 қола жүлдесі бар. Байрақты бәсеке 11 тамызға дейін жалғасады.
Мақаланың түпнұсқасы: https://kaz.nur.kz/sport/other-sports/2144305-olimpiada-2024-qazaqstandyq-zhengil-atlet-marege-zhetinshi-bolyp-zhetti/
