"Мұғалімдер жібермеді": Әбиба Әбужақынова Олимпиада алдында 4 емтихан тапсырғанын айтты

Дзюдодан Қазақстан әйелдер құрамасының көшбасшысы Әбиба Әбужақынова журналист Ақырыс Сейтқазының Youtube-тағы арнасына берген сұқбатында қазір сабақ пен спортты қатар алып жүргенін айтты. Бұл туралы KAZ.NUR.KZ тілшісі хабарлайды.

Әбиба Әбужақынова әрдайым жарыстар мен жаттығуларда жүріп мектеп бітіру кешіне, кейін диплом табыстау рәсіміне қатыса алмаған.

"Спортшыларда мектептегі балалық шақ болмайды. Біз әрдайым жарыстарда, оқу-жаттығу жиындарында жүреміз. Колледж бітіргенде де, университет бітіргенде де дипломымды өзім барып ала алмадым. Ешқандай шараға қатысқан жоқпын. Уақытым болмады. Дәл сол мамыр айларының соңында жарыстарымыз басталады", - деді Әбиба.

Сондай-ақ дзюдошы екінші жоғары білім алып жатқанын айтты. Ол қазір ҚазҰУ-да заңгер мамандығын игеріп жатыр екен.

"Қазір емтихандарымды қалдырмай өзім тапсырамын. Бірақ жарыстарда сұранамын. Мұғалімдер кейде ұрсады. Париж Олимпиадасына аттануға 1 апта қалғанда 4 емтихан тапсырдым. Мұғалімдер босатпай қойды.

Спортта білім керек. Білімсіз адам күресе алмайды. Татамиде де тез ойлану керек дегендей. Шынымды айтсам, 7-сыныпқа дейін жақсы оқыдым, кейін сабақты тастап, спортқа кетіп қалдым. Колледжге түскенде оқыған жоқпын, тек жарыстарда жүрдім. Ал университетте сабаққа аптасына 3-4 рет баратынмын", - деді дзюдошы.

Сонымен бірге Әбиба Әбужақынова қазіргі таңда ағылшынша сөздер жаттап, осы тілді үйреніп жатқанын айтты.

Еске салайық, Әбиба Әбужақынова 9 жылдан бері тамақ пісірмегенін айтып, оның себебін де түсіндірген еді.

Мәтіннен қате тапсаңыз, бізге жазыңыз