"Қазақстан барысы – 2024" турнирінде күміс жүлде еншілеген шымкенттік балуан Ерсұлтан Мұзаппаров үйленді. Бұл туралы KAZ.NUR.KZ хабарлайды.
Ерсұлтан Мұзаппаров үйлену тойында түсірілген фотоларды Instagram желісіндегі Stories-те бөлісті. Шымкенттік балуан Қаламқас есімді арумен отау құрған. Жас жұбайлардың қуанышына ортақтасып, тойға бірнеше спортшы барған. Олардың ішінде "Қазақстан барысы-2014" турнирінің жеңімпазы Мұхит Тұрсынов та бар.
Ерасыл Мұзаппаров биылғы "Қазақстан барысының" финалында Абай облысының балуаны Ерасыл Қажыбаевтан жеңіліп, күміс жүлде иеленген еді. Сондай-ақ спортшы дзюдодан Ақтөбеде өткен ел чемпионатында -100 кг салмақта қола жүлдегер атанды. Ол дзюдодан бұған дейін бірнеше Гран При, Гранд Слэм турнирінде бақ сынаған.
Еске салайық, "Қазақстан барысы-2024" турнирінің жеңімпазы Ерасыл Қажыбаевқа демеушілер көлік мінгізген еді. Сонымен бірге Қажыбаевқа Абай облысының әкімі Нұрлан Ұранхаев үш бөлмелі пәтер мен демеушілер атынан көліктің сертификатын табыстаған болатын.
Мақаланың түпнұсқасы: https://kaz.nur.kz/sport/other-sports/2206854-qazaqstan-barysy-2024-turnirining-kumis-zhuldegeri-shangyraq-koterdi/
