Рапирамен семсерлесуден Қазақстан жасөспірімдер құрамасының мүшесі София Ақтаева Фуджейрадағы (БАӘ) әлем кубогі кезеңінде алтын медаль еншіледі. Бұл туралы KAZ.NUR.KZ Ұлттық Олимпиадалық комитеттің ресми сайтына сілтеме жасап хабарлайды.
София Ақтаева финалда Қытай спортшысы Яжихэ Тэмен кездесті. Бұл бәсекеде Ақтаева 15:13 есебімен жеңіске жетті.
Cемсерлесу федерациясының мәліметінше, София 1/16 және 1/8 финалда да қытайлық спортшылармен шеберлік байқасып, екеуінде де 15:6 есебімен басым түскен. Ал ширек финалда Макао өкілін 15:13 есебімен, жартылай финалда мажарстандық спортшыны да дәл сондай есеппен ұтқан.
Еске салайық, қазақстандық семсерлесушілер Дубайда оқу-жаттығу жиынын өткізген еді. Оған Қазақстан ұлттық құрамасының көшбасшылары Руслан Курбанов, Артем Саркисян, Ерлік Сертай, Әйгерім Сарыбай, Карина Доспай, Анастасия Гулик, Бақдәулет Кұралбекұлы және басқалары қатысты.
Мақаланың түпнұсқасы: https://kaz.nur.kz/sport/other-sports/2207972-qazaqstandyq-sportshy-semserlesuden-alem-kubogi-kezenginde-altyn-medal-zhengip-aldy/
