Әлем кубогы кезеңі: Қазақстан жасөспірімдер құрамасы шпагамен семсерлесуден алтын медаль алды

Қазақстан жасөспірімдер құрамасы шпагамен семсерлесуден Бахрейннің Манама қаласында өткен Әлем кубогы кезеңінде алтын медаль жеңіп алды. Бұл туралы KAZ.NUR.KZ еліміздің Ұлттық Олимпиада комитетіне сілтеме жасап хабарлайды.

Командалық жарыста Қазақстан намысын Нұржан Әбжанов, Алексей Касаткин, Ғабиден Мұстафин және Кирилл Проходов қорғаған.

Ширек финалда біздің семсерлесушілер Сауд Арабиясынан 45:36 есебімен басым түскен. Ал жартылай финалда қазақстандықтар Қытай құрамасын 45:25 есебімен ойсырата жеңген.

Шешуші кезеңде Қазақстан құрамасы Франциямен кездескен. Семсерлесу барысында ұлттық құрама есе жіберіп жатса да, камбэк жасап, 44:43 есебімен жеңіске жеткен.

Қыздар құрамасы төртінші орынға ие болған. Ұлттық құрама сапында Каролина Фомина, Кристина Красикова, Наталья Зинякова және Арина Яковлева өнер көрсеткен.